मुर्शिबादामा स्कूल भ्यान-लोकल ट्रेनबीच ठक्कर, तीन नानी समेत चारको मृत्यु, धेरै घाइते

कोलकाता, 17 जुलाई (हि.स.)। पश्चिम बंगालको मुर्शिदाबाद जिल्लामा शुक्रवार बिहान लोकल रेलसँग स्कूल भ्यान ठोक्किँदा तीन जना स्कूले बालबालिका सहित चार जनाको मृत्यु भएको छ भने तीन जना र भ्यान चालक गम्भीर घाइते भएका छन्। घाइते सबैलाई मुर्शिदाबाद मेडिकल कलेज एण्ड अस्पतालमा भर्ती गरिएको छ। अधिकारीहरूले मृत्यु हुनेको संख्या बढ्नसक्ने आशंका व्यक्त गरेका छन्।

दुर्घटना बिहान 7 बजीतिर अजिमगञ्ज-कटवा रेलवे लाइनमा कर्णसुबर्ण स्टेशन र गोविन्दपुर रेलवे क्रसिङको बीचमा भयो। प्रत्यक्षदर्शीहरू अनुसार, निमतिता-कटवा लोकल रेल डाउन लाइनमा आइरहेको थियो। हावड़ा जाने नवद्वीप एक्सप्रेस अप लाइनमा केही समय अगाड़ी नै गुज्रिसकेको थियो। उक्त ट्रेन गुज्रिसकेपछि पनि फाटक बन्द नभएको आरोप लगाइएको छ।

स्थानीयहरू अनुसार, एउटा स्कूल भ्यानले फाटक खुला देखेपछि रेलवे लाइन पार गरिरहेको थियो। ठीक त्यही बेला तीव्र गतिमा रहेको निमतिता-कटवा लोकल रेलले भ्यानलाई ठक्कर दियो। ठक्कर यति गम्भीर थियो कि भ्यान पूर्ण रूपमा क्षतिग्रस्त भयो।

दुर्घटनामा तीन स्कूले बच्चाहरू र एक स्थानीय पुरुषको घटनास्थलमै मृत्यु भयो। जानकारी पाउने बित्तिकै पुलिस र रेलवे अधिकारीहरू तुरुन्तै घटनास्थलमा पुगे। उद्धारकर्ताहरूले गम्भीर घाइते तीन बालबालिका र भ्यान चालकलाई उद्धार गरेर मुर्शिदाबाद मेडिकल कलेज र अस्पताल लगे।

केही प्रत्यक्षदर्शीहरूले गेटम्यानले कथित रूपमा मादक पदार्थ सेवन गरेको आरोप लगाए। यद्यपि, यी आरोपहरूको आधिकारिक रूपमा पुष्टि भएको छैन। पुलिस र रेलवे अधिकारीहरूले दुर्घटनाको अनुसन्धान शुरु गरेका छन्। रेलवे अनुसन्धान टोली पनि घटनास्थलतर्फ प्रस्थान गरेको छ। अधिकारीहरूले दुर्घटनाको परिस्थिति र कुनै लापरवाही संलग्न थियो कि थिएन भनेर निर्धारण गर्ने प्रयास गरिरहेका छन्।

हिन्दुस्थान समाचार / भवानी थामी